سه‌ره‌کی        په‌یوه‌ندی        ئه‌رشیف        لینک        زانیاری ماڵپه‌ڕ
   
وتاری هه‌ڤاڵ مسته‌فا چاوڕه‌ش - یادی چله‌ی شه‌هیدانی لیوای یه‌كی پاراستنی سلێمانی
راپۆرت ‌
  زه‌مینه‌ی‌ گه‌ڕانه‌وه‌ی‌ كورد بۆ ناوچه‌ دابڕاوه‌كان
به‌روار: 27/11/2017


سه‌رتیپ جه‌وهه‌ر‌
ئه‌وه‌ شه‌ڕی داعش له‌ عیراق كۆتایی هات، كۆتایی به‌و بیانووه‌ دێت كه‌ حه‌شدی شه‌عبی له‌پێناویدا پێكهێنرا، ئه‌ویش له‌ناوبردنی تیرۆرخوازانی داعش بوو، بۆیه‌ پرسی چاره‌نووسی ئه‌و هێزه‌ نا نیزامییه‌ كه‌ نزیكه‌ی‌ 70 گروپی جیاوازن، ده‌بێته‌ باسی رۆژه‌ڤ له‌ به‌غدا، واته‌ قسه‌كردن له‌سه‌ر هه‌ڵوه‌شاندنه‌وه‌و تواندنه‌وه‌یان به‌ڕێگه‌و رێكارێكی قانونی له‌ ناو سوپای عیراق یان هه‌ر چاره‌سه‌رێكی دیكه‌ گه‌رم‌وگوڕ ده‌بێت.
بێگومان له‌ به‌غدا دوو بۆچوونی جیاواز هه‌یه‌، یه‌كێكیان نزیكه‌ له‌ ئێران و ده‌یانه‌وێ‌ ئه‌و هێزه‌ نا نیزامییه‌ بمێنێته‌وه‌و به‌رده‌وام بێت، به‌ره‌كه‌ی‌ دیكه‌ به‌پێچه‌وانه‌وه‌ ده‌یانه‌وێ‌ ئه‌و هێزه‌ هه‌ڵوه‌شێته‌وه‌، به‌تایبه‌ت یه‌كێك له‌ مه‌رجه‌كانی پشتیوانیكردنی ئه‌مریكییه‌كان له‌ حه‌یده‌ر عه‌بادی بۆ دوای‌ هه‌ڵبژاردنی داهاتوو، نه‌هێشتن و كۆتاییهێنانه‌ به‌و هێزه‌، به‌ڵام پێناچێت ئه‌وه‌نده‌ سه‌ركه‌وتوو بێت، ئه‌مه‌ش له‌به‌ر چه‌ند هۆكارێك، یه‌كه‌م: حه‌یده‌ر عه‌بادی له‌ په‌رله‌مانی عیراق ته‌نها پێنج ئه‌ندام په‌رله‌مان پشتیوانی لێده‌كه‌ن. دووه‌م: نوری مالكی كه‌ هه‌ڤڕكی سه‌ره‌كییه‌تی زیاتر له‌ 100 ئه‌ندامی له‌ ناو په‌رله‌ماندا هه‌یه‌، ئه‌مه‌ جگه‌ له‌وه‌ی‌ مالكی خاوه‌نی پشتیوانیی و هێزێكی گه‌وره‌یه‌ له‌ ناو حوكمڕانی‌و به‌شێكی گه‌وره‌ی جومگه‌كانی ده‌سه‌ڵات‌و فه‌رمانده‌ سه‌ربازییه‌كان لایه‌نگری ئه‌و ده‌كه‌ن. سێیه‌م: ئه‌و هێزه‌ له‌ نزیكه‌ی‌ 70 گروپی جیاواز پێكدێت‌و زۆربه‌یان له‌ ژێر كۆنترۆڵی حكومه‌تدا نین، باشترین به‌ڵگه‌ش كاتێك هێزی سه‌رایا سه‌لام له‌ كه‌ركوك كشایه‌وه‌، به‌فه‌رمانی موقته‌دا سه‌در بوو نه‌ك عه‌بادی، كه‌ فه‌رمانده‌ی‌ هێزه‌ چه‌كداره‌كانی عیراقه‌.
یه‌كێك له‌ ئه‌گه‌ره‌ به‌هێزه‌كان، پێكدادانی ئه‌و هێزانه‌یه‌ به‌ناوی حه‌شدی شه‌عبی، ئه‌مه‌ كاریگه‌ری‌ ده‌كاته‌ سه‌ر بووژانه‌وه‌ی‌ تیرۆر له‌ هه‌موو ناوچه‌ سوننه‌ نشینه‌كان، بێگومان راسته‌وخۆ كاریگه‌ری‌ ده‌كاته‌ سه‌ر ناوچه‌ دابڕاوه‌كانی كوردستان‌و ئه‌منییه‌تی ناوچه‌كه‌ ده‌شێوێت، ئه‌وكات عیراق ناتوانێت كۆنترۆڵی ئه‌و ناوچانه‌ بكات.
پرسیاری گرنگ له‌ نێو ئه‌و جه‌نجاڵی‌و ئاڵۆزییه‌ی‌ ناوچه‌كه‌، كه‌ پێده‌چێت به‌شێك له‌ پروشكه‌كانی به‌ر ئێمه‌ش بكه‌وێت، واته‌ ئه‌گه‌ر گۆڕانێك له‌ عیراق هاته‌ پێش یان شه‌ڕێكی ناوخۆی ئه‌و هێزانه‌ دروست بوو، كورد چی ده‌كات؟ ئاماده‌یه‌ بۆ ئه‌و بارودۆخه‌؟
ئه‌وه‌ی‌ ده‌بینرێت ناو ماڵی كورد له‌ بارودۆخێكی زۆر خراپدایه‌، له‌لایه‌ك نێوانی لایه‌نه‌ سیاسییه‌كان، له‌لایه‌كی دیكه‌ ره‌وشی بژێوی‌و حوكمڕانیی له‌ هه‌رێمی كوردستان زۆر ئاڵۆز بووه‌و له‌وه‌ناچێت به‌مزووانه‌ بتوانرێت چاره‌بكرێت، هه‌موو ئه‌و بارودۆخانه‌ له‌كاتێكدان كه‌ ناوچه‌كه‌ له‌ كوڵانێكی خێرادایه‌و پێویست ده‌كات كورد بۆ ئه‌م دۆخه‌ ئاماده‌یی هه‌بێت، نه‌خاسمه‌ ئه‌گه‌ره‌كانی ئاڵۆزبوونی ناوخۆ له‌ عیراق له‌ ماوه‌ی‌ داهاتوودا، ئه‌گه‌ر ئه‌و ئه‌گه‌رانه‌ راست ده‌ربچن، زه‌مینه‌ی‌ دووباره‌ گه‌ڕانه‌وه‌ی كورد بۆ ناوچه‌ دابڕاوه‌كانی كوردستان زۆر زیاتر ده‌بێت، هه‌م هاوكێشه‌كان گۆڕانیان به‌سه‌ردا دێت، هه‌میش هێزی به‌رامبه‌ر په‌رته‌وازه‌و لاواز ده‌بێت، به‌ڵام ئه‌و په‌رته‌وازه‌ییه‌ی‌ ئێستا له‌ هه‌رێمی كوردستان‌و نێوان لایه‌نه‌ سیاسییه‌كاندا ده‌بینرێت، ره‌نگه‌ جارێكی دیكه‌ كورد له‌و یارییه‌ی‌ ناوچه‌كه‌ دوور بخاته‌وه‌و ئه‌و رۆڵه‌ی‌ ماویه‌تی نه‌توانێت سوودی لێ ببینێت، هاوكات ئه‌گه‌ر پروشكی زیانبه‌خشیش هه‌بێت به‌هۆی ئاڵۆزییه‌كان به‌شێكیمان به‌ركه‌وێت‌و دیسان ئه‌گه‌ر بارمان گرانتر نه‌كات، ئه‌وا بێگومان كاریگه‌ری‌ خراپی بۆ سه‌ر ئێمه‌ ده‌بێت.