سه‌ره‌کی        په‌یوه‌ندی        ئه‌رشیف        لینک        زانیاری ماڵپه‌ڕ
   
وتاری هه‌ڤاڵ مسته‌فا چاوڕه‌ش - یادی چله‌ی شه‌هیدانی لیوای یه‌كی پاراستنی سلێمانی
هه‌مه‌ڕه‌نگ ‌
  ناسری ره‌زازی‌: کورد میلله‌ت نییە عیلله‌تە
به‌روار: 27/01/2018


ناسری‌ ره‌زازی‌، كه‌ ئێستا له‌وڵاتی‌ سویده‌، له‌باره‌ی نوێترین کاری نوسین‌و هونه‌رییه‌وه‌ به‌اوێنه‌ی‌ راگه‌یاند نوسینه‌وه‌ی بیره‌وه‌رییه‌کانی ژیانی‌ به‌ده‌سته‌وه‌یه‌ که ‌پێکهاتوه‌ لهپێنج به‌رگ، ئه‌و وتی‌ “‌وه‌رگێڕانی شیعری خه‌یامم ته‌واو کردوه‌، به‌ڵام به‌مزوانه‌ بڵاونابێته‌وه‌ چونکه‌ خه‌یام ده‌بێ بیناسی، ده‌بێ بزانی کێیه‌، 243 چوارینه‌ی خه‌یامم وه‌رگێڕاوه‌، ‌جیاواز له‌وه‌ فه‌رهه‌نگۆکێکم به‌ده‌سته‌وه‌‌یه‌ ئه‌وه‌ش نزیکه‌ی 700 لاپه‌ڕه‌یه‌ که ‌زۆربه‌ی وشه‌ی کوردی تازه‌و دۆزراوه‌ن، پاشان بۆکاری هونه‌ری من پێنج ده‌فته‌رم کردۆته‌ خه‌رجی سێ دێ یه‌کی تازه‌ که ‌له‌وڵاتێکی تر کاری موزیکی کراوه‌، من ئاماده‌بوم به‌دو ده‌فته‌ر بیفرۆشم نه‌کرا بۆیه‌ جارێ رایده‌گرم، کێشه‌که‌ی ئێمه‌ ئه‌وه‌یه‌ هونه‌ر لای‌ ئێمه‌ هیچ رێزێکی نییه‌”.
له‌باره‌ی زمان‌و فه‌رهه‌نگی کوردی‌و ئه‌و کێشه‌و ئاسته‌نگانه‌ی‌ که ‌بۆی هاتۆته‌ پێش، ره‌زازی وتی “زۆر به‌داخه‌وه‌ تازه‌ به‌خه‌ویش شتێک وه‌ک کۆڕی زانیاری کورد نابینینه‌وه‌، چونکه‌ که‌سانێکی تێدابوو که ‌هه‌مویان که‌ڵه‌پیاو بون، هه‌مویان نوسه‌ر بون، لانیکه‌م با باشتر بڵێم چه‌ند که‌سێکی لێده‌رچێ وه‌ک کۆچکردو مه‌سعود محه‌مه‌د که‌ به‌لای منه‌وه‌ فه‌یله‌سوف بو، ‌که‌سانی تێدابو زمانزان بو، به‌ڵام ئه‌کادیمایای کوردی که ‌دامه‌زرا وانه‌بو، هیچ شتێکی ئه‌وتۆیان به‌ئه‌نجام نه‌گه‌یاند”.
وتیشی‌ “من رێزم بۆ ئه‌کادیمیای کوردی که‌سی وای تیایه‌ که ‌فڕی به‌سه‌ر زمانی‌ كوردییه‌وه‌ نیه، ئه‌مانه‌ نه‌یانتوانی فه‌رهه‌نگستاتێک دروست بکه‌ن پڕی بکه‌ن له‌زمانزان‌و زمانه‌وان‌و هه‌ندێک پیشه‌وه‌ر بۆئه‌وه‌ی بتوانن زمانه‌که‌ زیندو رابگرن،به‌ڕاستی زمانی کوردی ئێستا توشی کێشه‌یه‌ ده‌یان وشه‌ی نابه‌جێی تێدا هاتوه‌ له‌دوباره‌وه‌ تاوه‌کو ناوزه‌ندو هه‌ماهه‌نگ‌و ئاسایش که‌ئه‌مانه‌ هیچیان کوردی نین، به‌کورتی ئه‌کادیمیا نه‌یانتوانی درێژه‌پێده‌ری کۆڕی زانیاری کورد بن”.
له‌باره‌ی‌ تێڕوانینی خۆی وه‌کو هونه‌رمه‌ندێک بۆ هه‌لومه‌رجی‌ هونه‌ریی‌ ئێستای‌ رۆژهه‌ڵاتی‌ كوردستان، ئه‌و وتی‌ “كۆماری‌ ئیسلامی‌ هه‌ر له‌سه‌ره‌تای دامه‌زراندییه‌وه‌ هه‌تاوه‌کو ئێستا هیچ خێرێکی بۆ کۆمه‌ڵگه‌ی کورده‌واری نه‌بوه‌. هه‌ر له‌سه‌ره‌تاوه‌ هونه‌ریان قه‌ده‌غه كرد، به‌ڵام نه‌یانتوانی پێشیپێبگرن، دواتر چون ئه‌و گروپانه‌ی کاری هونه‌ریان ده‌کرد ناچار به‌وه‌کرد که‌گۆرانی مه‌زهه‌بی بڵێن بۆشێواندنی کولتوری کوردی”.
، ره‌زازی ئاماژه‌ی‌ به‌وه‌ كرد كه‌ كوردستان پێویستی‌ به‌هه‌ڵگیرسانی شۆڕشێکی نه‌ته‌وه‌یی رۆشنبیرییه‌، ئه‌و وتی‌ “من ده‌مێکه ‌هاواری ئه‌مه‌ ئه‌که‌م، ده‌مێکه‌ پێشنیازم کردوه‌ که ‌ئێمه‌ ده‌بێ ئه‌م کاره‌ بکه‌ین، ئێمه‌ ده‌بێت خه‌باتێکی فه‌رهه‌نگی سیاسی بکه‌ین نه‌ک خه‌باتێکی سیاسی فه‌رهه‌نگی، ئه‌زانی چۆن کۆمۆنیستێکی کورد له‌گه‌ڵ کوردێکی کۆمۆنیست جیاوازی هه‌یه‌؟ ئێمه‌ ده‌بێت خه‌باتێکی فه‌رهه‌نگی سیاسی بکه‌ین بۆئه‌وه‌ی که بۆ ‌نه‌ته‌وه‌که‌مان رون بکه‌ینه‌وه‌، زۆرینه‌ی خه‌ڵکی کورد هێشتا نه‌ته‌وه‌یی نییه‌، هێشتا خه‌ڵکی کورد به‌ته‌واوی سۆزی نییه‌ بۆ نیشتیمانه‌که‌ی‌و بۆ زمانه‌که‌ی!”.
وتیشی‌ “باشه ‌کاتێک تۆ دار بشکێنی‌و کاتێک تۆ دوکان بسوتێنی‌و بازاڕ هه‌ڵته‌کێنی ئه‌مه ‌کاری نه‌ته‌وه‌یی نییه‌، ئێمه‌ ئه‌بێ له‌گۆرانیبێژو هونه‌رمه‌ند به‌گشتییه‌وه‌ بگره‌ تاده‌گاته‌ نوسه‌رو روناکبیر کارێک بکه‌ین ئه‌وه‌ی که ‌پێمان ده‌کرێت له‌ده‌ره‌وه‌ی وڵات‌و ناوه‌وه‌ی وڵات خه‌ریکی ئه‌وه‌بین که ‌نه‌ته‌وه‌که‌مان زیاتر خۆشبوێت، جا به‌هۆنراوه‌ بێت یا به‌گۆرانی بێت یان به‌هه‌ر شێوه‌ خه‌باتێک بێت،به‌ڵام به‌داخه‌وه‌ من زۆجار وتومه‌ ئێمه‌ ئه‌زمون له‌ڕابردو وه‌رناگرین، کورد نه‌ته‌وه‌یه‌کی ئازاو‌ میواندارو قاره‌مانه‌ ئه‌وه‌ به‌جێگه‌ی خۆی، به‌ڵام کاتێک که ‌دێته ‌سه‌رباری ئه‌وه‌ ‌کورد تێبکۆشێ بۆ مافی نه‌ته‌وه‌که‌ی له‌سیاسه‌ت‌و له‌سه‌ر مێز لاوازه‌ به‌داخه‌وه‌، ئه‌مه‌ یه‌کێکه‌ له‌کێشه‌کانی ئێمه‌، من پێموایه‌ ئه‌گه‌رخه‌باتێکی فه‌رهه‌نگی سیاسی‌و روناکبیری بکرێت ئه‌و کێشانه‌مان نامێنێت”.
ره‌زازی‌ هۆكاری‌ ئه‌مه‌ش ده‌گه‌رێنێته‌وه‌ بۆ لاوازیی‌ په‌روه‌رده‌، ئه‌و وتی‌ “ئێمه‌ په‌روه‌رده‌که‌مان لاوازه‌، ئه‌وپه‌روه‌رده‌یه‌ی ئێمه‌ په‌روه‌ره‌ده‌یه‌کی سه‌قه‌ته‌، ئه‌بێ په‌روهر‌ده‌یه‌کی باش بێت‌و سه‌ره‌تا له‌بنه‌ماڵه‌وه‌ ده‌ستپێبکه‌ین، نابێ له‌کۆمه‌ڵگاوه‌ ده‌ست پێبکرێت، مرۆڤ نابێ له‌کۆمه‌ڵگه‌وه‌ ده‌ستپێبکات، من نه‌توانم خۆم دروست بکه‌م چۆن ده‌توانم خه‌ڵکی تر دروست بکه‌م، ئێمه‌ ده‌بێ ئه‌وه‌مان له‌به‌رچاو بێت ده‌بێ نه‌ته‌وه‌و زمانه‌که‌مان خۆشبوێت من ناڵێم کورد چاوی له‌هه‌مو نه‌ته‌وه‌کانی تر ره‌ش تره‌ نه‌خێر هیچ نه‌ته‌وه‌یه‌ک گه‌وره‌یی زیاتری به‌سه‌ر نه‌ته‌وه‌کانی تره‌وه‌ نییه‌، به‌ڵام ده‌بێ کارێک بکه‌ین که‌ خه‌ڵکی کورد له‌منه‌خۆشییه‌ ره‌وانییه‌ ده‌ربێنین، ده‌رده‌کورد هه‌مومانی کوشتوه‌و توشی کێشه‌ی کردوین، زۆر له‌شاعیره‌کانمان بۆنمونه‌ مامۆستا هێمن ده‌ڵێ (چیبکه‌ین ده‌رده‌کورد وایکردوه‌ که‌ئێمه‌ توشی ده‌ردی سه‌ری بین)، نمونه‌ دێنمه‌وه‌ بزانه‌ تورک که‌ بە‌خه‌نجه‌ر وه‌کو داعش ئه‌وناوچانه‌یان دابڕ کرد بۆخۆیان ئیسلامیان کرد به‌فه‌لسه‌فه‌یه‌ک بۆخۆیان‌و به‌وشێوه‌یه‌ که‌ڵکیان لێوه‌رگرت ئێمه‌ش نه‌مانتوانیوه‌ تاکوئێستا بۆخۆمان فه‌لسه‌فه‌یه‌ک دابڕێژین”.
وتیشی‌ “له‌ده‌روه‌ی وڵات ئێستا کورد شوێنێکی نییه‌ تێیدا کۆبێته‌وه‌؟ هه‌ر پارتێکی کوردی باوه‌ڕبکه‌ن باره‌گایه‌کیشی بۆخۆی نییه‌، بڕوام پێبکه‌ن (PKK)ی‌ ڵێده‌رچێت پارته‌کانمان باره‌گایه‌کیان نییه‌ بڕۆین له‌گه‌ڵیان دانیشین‌و چایه‌ک بخۆینه‌وه‌، من چه‌ند ساڵه‌ هاوار ده‌که‌م ده‌ڵێم با له‌ده‌ره‌وه‌ی وڵات له‌هه‌مو پایته‌خته‌کان داواله‌خه‌ڵکی کورد بکه‌ین ئابونه‌یان لێوه‌ربگرین ماڵێک دروست بکه‌ین ناوی بنێین ماڵی کورد نه‌ک ماڵی حیزب، ئه‌گه‌ر کورد سه‌ره‌خۆشیه‌کی هه‌بوو یان زه‌ماوه‌ندو سه‌ره‌خۆشی‌و دانیشتنێکی هه‌بو، له‌وێ به‌ڕێوه‌ی به‌رێ، ئێمه‌ تائێستا ئه‌وه‌مان نییه‌، ئه‌ڕۆن له‌ڕێستۆرانه‌ سریانیه‌کاندا پاره‌یه‌کی زۆرده‌ده‌ن سه‌ره‌خۆشیه‌کانیان ده‌به‌ن به‌ڕێوه‌، سه‌ره‌خۆشی کۆچکردو مام جه‌لالیان له‌ڕێستۆرانتی سریانیدا داناوه‌ پاره‌یه‌کی زۆریان داوه‌، ئه‌ی بۆ ده‌سه‌ڵاتی باشور خۆت ئه‌وه‌ دانانێی؟! با من ره‌خنه‌یه‌ک له‌کاک نێچیرو کاک قوباد بگرم وه‌کو سه‌رۆکی حکومه‌ت‌و جێگره‌که‌ی بۆ هه‌تاوه‌کو ئێستا ماڵێکیان دانه‌ناوه‌ به‌ناوی ماڵی کورد که‌ئه‌وان وه‌کو نوێنه‌ری ئه‌و به‌شه‌ به‌ڵکو ئه‌گه‌ر ده‌ردو چاره‌ڕه‌شیه‌کمان هه‌بو، تێیدا کۆبینه‌وه‌؟! بامن به‌کورتی بڵێم ئێمه‌ نه‌ته‌وه‌ نین ئێمه‌ شته‌وه‌ین، ئێمه‌ میله‌ت نین ئێمه‌ عیله‌تین”.