سه‌ره‌کی        په‌یوه‌ندی        ئه‌رشیف        لینک        زانیاری ماڵپه‌ڕ
   
وتاری هه‌ڤاڵ مسته‌فا چاوڕه‌ش - یادی چله‌ی شه‌هیدانی لیوای یه‌كی پاراستنی سلێمانی
ئه‌ده‌بیاتی شۆڕش ‌
   لەلاپەڕەی بیرەوەریەکانمەوە
به‌روار: 27/01/2018


سەرەتای ساڵی ۲٠٠۳ ، سەرەتای هەڵمەتی شەڕی راگەیاندنی هاوپەیمانی نێودەوڵەتی بەسەرۆکایەتی ئەمەریکابو دژی رەگەزپەرسترین رژێمی بەعسی عەرەبی عێراقی . سەرلەبەری ئەو شەڕی راگەیاندنە بۆ لێدان و روخانی ئەو رژێمە دڕندەیەبو کە یەک زمانی دەزانی ئەویش تەنها ( زمانی کوشت و بڕ ) !!!
ئەو هەڵمەتی شەڕی راگەیاندنە مەترسیەکی بۆ سەر حکومەتی هەرێمیش هێنایە ئاراوە . ئەویش وابیردەکرایەوە کە لە ئەگەری لێدانی ڕژێمی بەعس لەلایەن هاوپەیمانانەوە ، دوورنیە کە رژێمی بەعس داخی خۆی بە حکومەتی هەرێم نەڕێژێ و کوێرانە نەکەوێتە بۆردومانکردنی شار و شارۆچکەکانی کوردوستان و جارێکی دیکەش تووشی کۆڕەوێکی دیکە نەبینەوە . بۆبەرەنگاربوونەوەی ئەو مەترسیەش ، لەلایەن سەرۆکایەتی ئەنجومەنی وەزیرانەوە کە ئەوسا بەڕێز دکتۆر بەرهەم سەرۆکی ئەنجومەنی وەزیرانی کەرتی سەوزبو . بڕیاردرا کە لەدەڤەری قایمقامیەتە سنوریەکانەوە شوێنی خێوەتگا بۆ ئەگەری کۆڕەوو ئاوارەبوون سازبکرێ .
ئەوسا من قایمقامی شارباژێڕبووم ، لەدەڤەری خۆمان دوو شوێن چادرگەمان سازکرد . یەکێکیان لە شوێن ئۆردووگا زۆرەملێکەی شارۆچکەی کەنارو کەبەهاوکاری شارەوانی چوارتا سازو ئامادەکرا ، ئەوی دیکەیان لەناحیەی ماوەت بەهاوکاری شارەوانی ماوەت و بەسەرپەرشتی بەڕێوەبەری ناحیەی ماوەت ، لە خوارماوەتەوە و لەسەر زەوی بەڕێزان غەریب کوێخا کریم ، خوالێخۆشبو حاجی علی حسین فقێ و خۆالێخۆشبو سابیر عزیز ساڵح ، دوای رەزامەندی خۆیان سازکرا .
وەکی هەمیشە يەکێتی بەبێ تەکەتول و دەستەگەرێتی نەیدەتوانی بژی و ئەوساش لەرووی دەستەگەرییەوە یەکێتی بەسەر دووباڵی بەهێزدا دابەشببو ، کەپێیاندەگوترا ( باڵی حکومەت و باڵی حزب ) ئەوە سەرەڕای چەند دەستەگەری وردیلەی دیکە . بەڵام بەشێوەی گشتی ئەو دووباڵە باڵی زاڵی دەستەگەریبوون و کادرانی رێکخستنەکان و بەرپرسی فەرمانگەکان کەوتبوونە نێوان ئەو دوو بەرداشەوەو کۆیلەکانی هەردووک باڵەکەش لە روانگەی پێگەو بەرژەوەندیە خودیەکانیانەوە دەسکی بەرداشەکەیان گرتبوو و یەکتریان پێدەهاڕی !! بەڵام لێرەدا نەگبەتیەکە پتر بۆ ئەو کادرو بەرپرسە فەرمانگەیانەبو کەسەر بەهیچ لەو باڵباڵێنانە نەبوون و بەدەردی ( چیرۆکی ئەو منداڵە چووبوون ) کەلەنێوان میوان و دایکوباوکیەوە بەرچەپۆک درابو .
لێدانی عێراق لەنزیکبونەوەدابو ، دەستەگەری ناو یەکێتیش گوریس کێشەکێی بوو . بۆ بەرەنگاربوونەوەی ئەگەری پێشهاتەکانیش ، یەکێتی ریزەکانی یەکێتی حاشاهەڵنەگربو ، بەتایبەتی گونجان و پێکەوە هەڵکردنی حزب و حکومەت ، وە وردتر بڵێم مەڵبەندەکان و کۆمیتەکان لەلایەک و دامودەزگاکانی حکومەت لەلایک .
وە بۆ ئەم هاوکاریی و پێکەوە کارکردنەش . ( سەعات یانزەی پێشنیوەڕۆی رۆژی ۱۷ / ۲ / ۲٠٠۳ ) لە هۆڵی مەڵبەندی رێکخستنی سلێمانیدا ، کۆبوونەوەیەکی ( حزبی و حکومی ) مان پێئەنجامدرا .
کۆبونەوەکە تایبەتبو بە قایمقام و لێپرسراوی کۆمیتەکان و ئەندامە کارگێڕەکانی یەکێتی . لەئاستی باڵای حزبی و حکومیش ئەم بەڕێزانە بەشداربوون :
۱__ کاک دکتۆر بەرهەم سەرۆکی ئەنجومەنی وەزیران ۲__ کاک فەرەیدون عبدالقادر وەزیری ناوخۆ ۳__ کاک ئەرسەلان بایز ئەندامی مەکتەبی سیاسی ٤__ کاک مستەفا سەید قادر ئەندامی مەکتەبی سیاسی ٥__ کاک ئاسۆ شێخ نوری پارێزگاری سلێمانی ٦__ کاک شێردڵ حوەیزی وەزیری پێشمەرگە۷__دکتۆر محەمەد خۆشناو وەزیری تەندروستی .
کۆبونەوەکە لەلایەن دکتۆر بەرهەمەوە ئەنجام دراو زۆری باسی تەبایی و یەکڕیزی و هاوکاری حزب و حکومەتی کرد . چەند برادەرێک بەشداری قسەکردنیان کرد ، یەک لەوانە منبووم ، زۆر بە ڕاشکاوانە پەنجەم خستە سەر کەم و کوڕیەکان و هۆکارە بنەڕەتیەکانی دەستەگەری و دوو سەنگەری ناو یەکێتی و هەموویم گێڕایەوە بۆ سەرکردایەتی و بەتایبەتی دەستەگەری ناو مەکتەبی سیاسی نەک ریزەکانی خوارەوە . بەکورتیەکەی گوتم :
ئێوە لەمەکتەبی سیاسیدا کۆکوتەبابن ، ئێمە لەخوارەوە عەیبمان نامێنێ .
بەڵام بەداخەوە دکتۆر بەرهەم قسە راستگۆیەکانی منی زۆر پێناخۆشبو ، هەربۆیە دەرگای پرسیار و گفتوگۆی داخست و کۆتایی بەکۆبوونەوەکە هێنا . 
من زۆر دڵتەنگبووم بۆ وەزعی یەکێتی و لەدڵیخۆمدا گوتم :
هەی یەکێتی نەگبەت ، دکتۆر بەرهەمێک ، دکتۆرای هەبێ و لەئەمەریکا خوێندبێتی و لەئەمەریکاش بووبێ و لەوێشەوە هاتبێتەوە وڵات و لە باڵاترین ئۆرگانی یەکێتی و سەرۆکی ئەنجومەنی وەزیرانبێ و لە شاخیشەوە نەهاتبێ تابڵێین عەقڵیەتی شاخی هەیە ، کەچی یەک رەخنەو یەک وەڵامی دروستی خوارەوەی قبووڵنەبێ و کۆبوونەوە کە داخا .
دوای کۆبوونەوەکە ئێمەی قایمقام چوینە پارێزگا ، من هەندێک درەنگ گەیشتم . کە گەیشتم بەسەر غەیبەتی خۆمدا کەوتم .
برا قایمقامەکان دەوری کاک فەرەیدونیان دابو ، کاک فەرەیدون نەیزانی من گەیشتومەتە ژورێ و لەپشتی سەریەوە راوەستاوم . بە قایمقامەکانی دەگوت :
ئاخر بێئەقڵێکی وەک سەید ئەحمەدیان کردۆتە قایمقام بۆیە حاڵی حکومەتەکەمان و یەکێتیەکەمان جوانە .
منیش لەدواوە دەستم خستە سەر شانی و گوتم :
بۆ کاک فەرەیدون هەر کەسێک لەیەکێتیدا نەبوو بەکۆیلەی هەڵەکانتان و بە باش و خراپی ئێوەی سەرەوەی نەگوت بەڵێ ، وا کەرو بێئەقڵە !!.