سه‌ره‌کی        په‌یوه‌ندی        ئه‌رشیف        لینک        زانیاری ماڵپه‌ڕ
   
وتاری هه‌ڤاڵ مسته‌فا چاوڕه‌ش - یادی چله‌ی شه‌هیدانی لیوای یه‌كی پاراستنی سلێمانی
کوردستان ‌
  لاهور شێخ جەنگی پەیامێکی لەبارەی عەفرینەوە بڵاوکردەوە
به‌روار: 22/01/2018


لاهور شێخ جەنگی بەرپرسی ئاژانسی پاراستن و زانیاری/ زانیاری هەرێمی کوردستان پەیامێکی لەبارەی هێرشەکانی تورکیا بۆسەر کانتۆنی عەفرین لە رۆژئاوای کوردستان بڵاوکردەوە و رایگەیاند '' هەوڵدان بۆ لەناوبردنی ناوچەیەکی ئارام لە رۆژئاوای کوردستان، خزمەت بە سەقامگیریی هەرێمایەتی ناکات ''.

لەو پەیامەیدا کە ئەمڕۆ دوو شەممە بڵاویکردەوە، لاهور شێخ جەنگی دەڵێت '' پاش نیوەڕۆی رۆژی 20ی 1ی 2018، دەوڵەتی تورکیا ئۆپەراسیۆنێکی سەربازیی بەرامبەر عەفرین لە رۆژئاوای کوردستان راگەیاند. هێزی ئاسمانیی و زەمنیی تورکیا، بە هاوبەشی لەگەڵ گروپە تورکمان و عەرەبە تەکفیرییەکان دەستیان بە ئۆپەراسیۆنێکی سەربازیی کردوە و مەرامیانە، ناوچەی ئارامی عەفرین، کە بۆتە پەناگەی زیاتر لە 400 هەزار ئاوارەی شەڕی داعش، داگیر بکەن و خەڵکە رەسەنەکەی دەرپەڕێنن، و بیکەن بە ناوچەیەکی وێرانەی بە تورک و عەرەبکراو''.

بەرپرسی ئاژانسی پاراستن و زانیاری / زانیاری هەروەها دەڵێت '' ئەم ئۆپەراسیۆنە کە بە بەرچاوی کۆمەڵگەی نێودەوڵەتی و بە ئاگاداریی دەوڵەتانی روسیا و ئێران و سوریا بەڕێوە دەچێت، هەڕەشەیەکی راستەقینەیە لەسەر خەڵکی سڤیل، و پێکەوەژیانی نێوان پێکهاتەکان لە رۆژئاوا دەکاتە ئامانج و، وەکو هەوڵێک بۆ لێدان لە سەرکەوتنەکانی هێزی سوریای دیموکرات لە شەڕی دژ بە داعش، و پەکخستنی نفوزی هاوپەیمانیی نێودەوڵەتیی بە سەرۆکایەتی ئەمەریکا لە باکور و رۆژهەڵاتی سوریا لێکدانەوەی بۆ دەکرێت. لە چاوی گەلەکەشماندا، پەلاماردانی سەر عەفرین، ئەڵقەیەکە لە زنجیرەیەک سەرکوتکاریی رێگەپێنەدراو کە سەد ساڵە بەرامبەر گەلانی چەوساوەی ناوچەکە و بە تایبەت گەلی کوردستان، دوبارە دەکرێتەوە.''.

لاهور شێخ جەنگی ئیدانەی ئەو لەشکرکێشییە دەکات و دەڵێت '' ئێمە وێڕای ئیدانەکردنی ئەم لەشکرکێشییە، نیگەرانیی قوڵیی خۆمان بەرامبەر زیان و ئاکامەکانی هەڵگیرسانی شەڕی نەتەوەیی لەناوچەکەدا دەخەینەڕوو و داوا لە کۆمەڵگەی نێودەوڵەتی دەکەین بە ئەرکی ئەخلاقی و دامەزراوەیی خۆی هەستێ و، رێگە بە درێژەکێشانی بۆردومانی ئاسمانی و پەلاماری زەمینی بۆسەر عەفرین نەدات و دەسکەوتەکانی گەلی کوردستان لە رۆژئاوا، بپارێزێت''.

دەشڵێت '' ئێستا کە لە رۆژئاوا خوێنی بەناهەقڕژاوی خوشک وبراکانمان بۆتە ناسنامەیەکی تری سەربەزریی ئەم گەلە، باشوایە هەمووان ئەو حەقیقەتە لەبەرچاو بگرن کە ئیرادەی گەلی کوردستان بە هیچ هێزێک سەرکوت ناکرێت.''.

لە کۆتایی پەیامەکەیدا داوایەک ئاراستەی حکومەتی تورکیا دەکات و دەڵێت '' بۆیە داوا لە هەڵگیرسێنەرانی شەڕ دەکەین، داستانی خۆڕاگریی کۆبانی و شکستی دوژمنانی بهێننەوە بیری خۆیان، خۆ ئەگەر لەم ئۆپەراسیۆنە – وەک دەڵێن سەقامگیریی درێژخایەنیان مەبەستە، با لەجیاتی پەنابردن بۆ لەشکرکێشیی و قوڵکردنەوەی قەیرانەکان، پرۆسەی ئاشتی زیندو بکەنەوە و داننان بە مافی یەکسانی ئازادژیانی گەلان بنکە بنەما.

دەقی پەیامەکەی لاهور شێخ جەنگی لەبارەی هێرشەکانی تورکیا بۆسەر کانتۆنی عەفرین:

هەوڵدان بۆ لەناوبردنی ناوچەیەکی ئارام لە رۆژئاوای کوردستان، خزمەت بە سەقامگیریی هەرێمایەتی ناکات و ئاشتی و پێکەوە ژیانی درێژخایەن لە ناوچەکەدا دەخاتە بەردەم داڕمان.

پاش نیوەڕۆی رۆژی 20ی 1ی 2018، دەوڵەتی تورکیا ئۆپەراسیۆنێکی سەربازیی بەرامبەر عەفرین لە رۆژئاوای کوردستان راگەیاند. هێزی ئاسمانیی و زەمنیی تورکیا، بە هاوبەشی لەگەڵ گروپە تورکمان و عەرەبە تەکفیرییەکان دەستیان بە ئۆپەراسیۆنێکی سەربازیی کردوە و مەرامیانە، ناوچەی ئارامی عەفرین، کە بۆتە پەناگەی زیاتر لە 400 هەزار ئاوارەی شەڕی داعش، داگیر بکەن و خەڵکە رەسەنەکەی دەرپەڕێنن، و بیکەن بە ناوچەیەکی وێرانەی بە تورک و عەرەبکراو.

ئەم ئۆپەراسیۆنە کە بە بەرچاوی کۆمەڵگەی نێودەوڵەتی و بە ئاگاداریی دەوڵەتانی روسیا و ئێران و سوریا بەڕێوە دەچێت، هەڕەشەیەکی راستەقینەیە لەسەر خەڵکی سڤیل، و پێکەوەژیانی نێوان پێکهاتەکان لە رۆژئاوا دەکاتە ئامانج و، وەکو هەوڵێک بۆ لێدان لە سەرکەوتنەکانی هێزی سوریای دیموکرات لە شەڕی دژ بە داعش، و پەکخستنی نفوزی هاوپەیمانیی نێودەوڵەتیی بە سەرۆکایەتی ئەمەریکا لە باکور و رۆژهەڵاتی سوریا لێکدانەوەی بۆ دەکرێت. لە چاوی گەلەکەشماندا، پەلاماردانی سەر عەفرین، ئەڵقەیەکە لە زنجیرەیەک سەرکوتکاریی رێگەپێنەدراو کە سەد ساڵە بەرامبەر گەلانی چەوساوەی ناوچەکە و بە تایبەت گەلی کوردستان، دوبارە دەکرێتەوە.

ئێمە وێڕای ئیدانەکردنی ئەم لەشکرکێشییە، نیگەرانیی قوڵیی خۆمان بەرامبەر زیان و ئاکامەکانی هەڵگیرسانی شەڕی نەتەوەیی لەناوچەکەدا دەخەینەڕوو و داوا لە کۆمەڵگەی نێودەوڵەتی دەکەین بە ئەرکی ئەخلاقی و دامەزراوەیی خۆی هەستێ و، رێگە بە درێژەکێشانی بۆردومانی ئاسمانی و پەلاماری زەمینی بۆسەر عەفرین نەدات و دەسکەوتەکانی گەلی کوردستان لە رۆژئاوا، بپارێزێت.

ئێستا کە لە رۆژئاوا خوێنی بەناهەقڕژاوی خوشک وبراکانمان بۆتە ناسنامەیەکی تری سەربەزریی ئەم گەلە، باشوایە هەمووان ئەو حەقیقەتە لەبەرچاو بگرن کە ئیرادەی گەلی کوردستان بە هیچ هێزێک سەرکوت ناکرێت. بۆیە داوا لە هەڵگیرسێنەرانی شەڕ دەکەین، داستانی خۆڕاگریی کۆبانی و شکستی دوژمنانی بهێننەوە بیری خۆیان، خۆ ئەگەر لەم ئۆپەراسیۆنە – وەک دەڵێن سەقامگیریی درێژخایەنیان مەبەستە، با لەجیاتی پەنابردن بۆ لەشکرکێشیی و قوڵکردنەوەی قەیرانەکان، پرۆسەی ئاشتی زیندو بکەنەوە و داننان بە مافی یەکسانی ئازادژیانی گەلان بنکە بنەما.

لاهور شێخ جەنگی
۲٠۱۸/۱/۲۲