سه‌ره‌کی        په‌یوه‌ندی        ئه‌رشیف        لینک        زانیاری ماڵپه‌ڕ
   
وتاری هه‌ڤاڵ مسته‌فا چاوڕه‌ش - یادی چله‌ی شه‌هیدانی لیوای یه‌كی پاراستنی سلێمانی
راپۆرت ‌
  لیژنەی پێشمەرگە: وەزارەتی پێشمەرگە بەرپرسیارە لە شکستی ١٦ی ئۆکتۆبەر و کەریم سنجاری بانگهێشتی پەرلەمان دەکرێت
به‌روار: 13/12/2017


لیژنەیەكی پەرلەمان لێكۆڵینەوە لە هەشت میحوەری پێشمەرگە دەكات لەسەر ڕووداوەكانی 16ی ئۆكتۆبەر و ڕۆژانی دوایی كە لە میحوەری جەولەلا و كەركوكەوە دەست پێ دەكات تا شنگال و سەرۆكی لیژنەكەش دەڵێت: ״وەزارەتی پێشمەرگە بەرپرسیارە لەو شكستە و وەزیری پێشمەرگە بە وەكالەت بانگهێشتی پەرلەمان دەكرێت״.

دوای ئەنجامدانی ڕیفراندۆم لە 25ی ئەیلوول، سوپای عێراق‌ و حەشدی شەعبی لە 16ی ئۆكتۆبەردا هێرشیان كردە سەر كەركوك‌ و ناوچە جێناكۆكەكان‌ و پاش چەند كاتژمێرێك ئەو ناوچانەیان كۆنتڕۆڵ كردەوە.

لە ئێستادا لیژنەیەكی پەرلەمان سەرگەرمی لێكۆڵینەوەیە لەو ڕووداوانە كە سەرەتا هەوڵ دراوە تەنیا لە ڕووداوەكانی كەركوك بكۆڵێتەوە و دواتر فراوان كراوە بۆ لێكۆڵینەوە لە میحوەرەكانی سنووری پارتییش لە شنگال و موسڵ كە بە هەمان شێوە پێشمەرگە تێیدا كشایەوە.

ئاواز شێخ جەنگی، ئەندامی پەرلەمانی كوردستان لە فراكسیۆنی یەكێتیی بە رۆژنامەی״ئاژانس״ی راگەیاندووە: ״لیژنەی پێشمەرگە ڕاسپێردراوە بۆ لێكۆڵینەوە لە ڕووداوەكانی كەركوك و شنگال و مەخموور و ناوچەكانی تر، پارتی داوای كردووە تەنیا لێكۆڵینەوە لە كەركوك بكرێت و باسی ناوچەكانی تر نەكرێت״.

وتیشی: ״لیژنەی پێشمەرگەمان ڕاسپاردووە بۆ لێكۆڵینەوە لە ڕاستیی ڕووداوەكانی مانگی ئۆكتۆبەری ناوچە كێشەلەسەرەكان و كەركوك و ئەوانەش كە بەبێ تەقە چۆڵ كراون، لە كەركوك شەڕ كرا و ٩٦ شەهیدمان دا، بەڵام ناوچەكانی شنگال و مەخموور و ناوچەكانی تریش، بەبێ هیچ بەرگرییەك چۆڵ كران و ڕادەستی حەشدی شەعبی كران، ئەگەر فەرماندەی گشتیی هێزە چەكدارەكان كە ئەوكات مەسعود بارزانی بوو، بڕیاری دابوو شەڕ بكات، بۆچی بە هەموو میحوەرەكانی شەڕ نەكرا، ئەگەر بڕیاریشی دابوو شەڕ نەكات، بۆچی بە خەڵكەكە و هێزەكانی پێشمەرگەی نەوتبوو كە شەڕ ناكەین بۆ ئەوەی ئەو هەموو پێشمەرگە و هاووڵاتییە شەهید نەبن״.

دلێر ماوەتی سەرۆكی لیژنەكەی پەرلەمان ئاشكرای كرد كە لێكۆڵینەوەیان لە میحوەری یەكەوە دەست پێ كردووە تا میحوەری پێنجیشیان تەواو كردووە ‌و سێ میحوەریان ماوە ‌و هەفتەی داهاتوو كارەكان تەواو دەكەن‌ و ڕاپۆرتەكەیان دەدەنە سەرۆكایەتیی پەرلەمان‌ و كۆبوونەوەی لەسەر دەكەن.

دلێر ماوەتی بە رۆژنامەکەی وتووە: ״ڕاكانیان وەرگرتووە‌ و قسەی جیاوازیان بۆ كردووین لە بارەی شكستەكانەوە״، وتیشی: ״بەشێكیان دەڵێن فیشەك‌ و تەقەمەنییان بۆ نەهێناوین‌ و پێیان نەماوە، یان هێزەكانی حكومەتی عێراقی لە هەموو لایەكەوە هێرشیان كردووە‌ و بەهێز بوون ‌و شكاوین ‌و زۆربەی میحوەرەكان دەڵێن خۆمان شكاوین‌ و ئاگری دوژمن بەهێز بووە‌ و ئیمكانیاتییان لەبەر دەست نەبووە ‌و بەرگەیان نەگرتووە״.

بە پێی زانیارییەكانی رۆژنامەی ״ئاژانس״ لە پاش كۆتاییهاتنی ئەو ڕاپۆرتەی لیژنەكەی پەرلەمان كۆبوونەوەی پەرلەمان ئەنجام دەدرێت ‌و كەریم سنجاری، وەزیری پێشمەرگە بە وەكالەت بانگ دەكرێت لەسەر ڕووداوەكانی 16ی ئۆكتۆبەر.

دلێر ماوەتی دەڵێت: ״چوار ساڵە خەریكین 14 لیوامان یەك خستووه‌تەوە، بەڵام بە یەك ڕۆژ 10 لیوایان هەڵوەشاونەتەوە، دەركەوت كە وەزارەتی پێشمەرگە كارەكانی باش نەبووە، بۆیە ئەو لیوا هاوبەشانە هەڵوەشاونەتەوە و بەرپرسیارێتیی شكستەكە دەكەوێتە ئەستۆی وەزارەتی پێشمەرگە، كە نەبووەتە ئەوەی ببێتە چەترێك بۆ كۆكردنەوەی هێزەكان״.

نزیكبوونەوەی كۆتایی كاری ئەو لیژنەیە لە كاتێكدایە كە دوێنێ سێشەممە 12ی 12 ئاراس شێخ جەنگی فەرماندە لە هێزەكانی دژەتیرۆر لە نامەیەكدا بۆ پەرلەمان سەبارەت بە ڕووداوەكانی كەركوك دەڵێت: ״هەندێك زانیاریی گرنگ و وردم لایە دەربارەی ئەو كارەساتە، بۆیە لە ڕێی ئەم نامەیەوە ئێوە و هەموو خەڵكی كوردستان ئاگادار دەكەمه‌وه‌ كە ئامادەم بێم لە بەردەمی ئێوەی بەڕێزدا و بە ئامادەیی تێكڕای دەزگا ئیعلامییەكان هەموو ڕاستییەكان سەبارەت بەو بابەتە ئاشكرا بكەم، بە مەرجێك دانیشتنەكە كراوە بێت و ڕاستەوخۆ پەخش بكرێت بۆ ئەوەی كۆتایی بهێنرێ‌ بەم درۆودەلەسانەی كە جگە لە چەواشەكردنی ڕای گشتی هیچ مەبەست و مەرامێكی نییە״.

ئاواز شێخ جەنگی دەڵێت: ״بە گوێرەی زانیارییەكانم، ئاراس شێخ جەنگی ئامادەیی دەربڕیوە بۆ ئامادەبوون لە پەرلەمانی كوردستان و بە دلێر ماوەتیی ڕاگەیاندووە پێمان خۆشە ئێوە لە پەرلەمان داوا بكەن كە بێینە پەرلەمان و بە شێوەیەكی ڕاستەوخۆ و لە كۆبوونەوەیەكی كراوەدا سەرجەم زانیارییەكان ئاشكرا بكەین״.

لە ئێستادا بەشێك لە زانیارییەكانی ئەنجامی لێكۆڵینەوەی لیژنەكەی پەرلەمان دەركەوتوون كە جیاوازن لەو هۆكارانەی لە گەرمەی ڕووداوەكاندا باس دەكران.

جەعفەر شێخ مستەفا بەرپرسی یەكەی هێزەكانی 70ی یەكێتیی بە بە رۆژنامەی ئاژانسی راگەیاندووە: ״لیژنەكە قسەیان لەگەڵ كردووین ‌و ئێمە ڕێگەمان پێ داون هەرچی پرسیاریان كردووە جوابمان داونەتەوە‌ و هەر داواكارییەكی تریان هەبێت هەموو كارئاسانییەكیان بۆ دەكەین‌ و ڕوونكردنەوەیان بۆ دەدەین״.

وتیشی: ״هۆكاری شكستەكان‌ زۆرن ‌و ئەگەر هێزێكی نیشتیمانی هه‌بوایە سیمای حزبایەتیی پێوە نەبوایە؛ ڕەنگە ئەوە ڕووی نەدایە، لەوانە ئەوەیە كە وەزارەتی پێشمەرگە ویستوویەتی هەندێ شت بكات، بەڵام ڕێگری هەبووە لە بەردەمیدا، ئەوە جگە لە هۆكارەكانی شەڕی داعش و نەبوونی میزانییە بۆ وەزارەت‌ و دابینكردنی پێویستییەكان״.